ناس
في ناس تشيل هموم الناس..
و ناس بالجزم تنداس..
و ناس تموت من الجوع ..
و ناس تلبس و تاكل ماس..
و ناس تعيش و تموت بالرخيص و هي في الأساس يادوبها بشر .. يا دوبها ناس
في ناس تنجرح من أغلى الناس..
و ناس تبيع الحب برغيف عيش و ياريته ماس..
و ناس تعيش العمر يادوب ناس..
و ناس تموت من القهر على أغلى الناس..
و ناس تعيش القهر في بلدها و اهو .. كله ناس
في ناس في بلادها تعيش مطاطية الراس..
و ناس تنجرح في بلادها و تحت التراب تندس بدون إحساس..
و ناس تموت بالغدر من أحقر ناس..
و طفل يتحرم من أمه بغدر ناس..
و بلاد تفوت التار لجل تعلٍي في بلاد غيرها ناس..
و تحس يا ولدي القهر و يموت أشرف الناس لجل يعيشوا ناس..
و على كل شكل ولون تلاقي الناس..
لون يصدقك و لون يخون و اهو كله ناس..
في ناس تحلم تعيش زي الناس ..
تحلم تلاقي لقمه هنيه و هدمه هنيه و عيشه هنيه..
و ناس تحلم تموت زي الناس..
تندفن في مقابرها مش مقابر جماعية..
أطفال بتحلم بالدرس .. بالقلم و الكراس ..
أطفال تحلم تعيش الطفولة بريئة مش دموية ..
في ناس في فلسطين و ناس في العراق و ناس في السودان ..
و ناس في كل شبر فيكي يا دنيا .. باسم الله دول ناس ..
في ناس كتير مجروحين..
و ناس من غلبهم جوا الدموع مسجونين..
و ناس تعيش العمر ذليلة لجل لقمة عيش مش حتى رغيف ..
و ناس تشوف وجعها سجين العين..
و ناس لو تموت متقولش هات ولا فين ..
و ناس عرب و ناس مسلمين في بلادهم قبل بلاد غيرهم متهانين..
و أقول إيه؟ و أقول لمين؟و الناس يا ناس شاهدين
أقول إيه؟ و اشكي لمين؟ و الشكوى لغير الله مذلًه ..
أقول لمين؟ و اشكي لمين؟ و العالم الله ..
يوم فرح و ألف جرح و كله على الله ..
و الدنيا هايصه و عالم لايصه و الكون مذلًه ..
اشكي لمين و أقول لمين و العالم الله ..
نقوم و نقعد ، نشجب .. ندين و كله يا ناس على الله
