بقلم : شيماء الألفى
كان يا مكان
يا سادة يا كرام
على صوت الآدان
والدنيا لسة ضلمة
والشمس لسة نايمة
والبرد انيابه باينة
وكل الشياطين نيام
صوت المؤذن تجلى
الله أكبر
الله أكبر
حي ع الصلاة
حي ع الفلاح
حي ع الثورة
حي ع الكفاح
وقف صوت الليل
في حلق النهار
متردد ما بين
تغيير وجنة
ولا حرب ونار
ثورة ايه يا سيدنا
جمال ده اه حبيبنا
بس مات من زمان
وسيرته باقية في صوره
في القلب وع الحيطان
لف المؤذن ضهره
وكأنه هيقيم الصلاة
لكنه قال يا قوم يا نيام
حيوا ع الثورة حيوا ع الكفاح
جمال ده اصله مصري
والمصري فكره سامي
المصري صوته عالي
المصري دمه غالي
المصري هو المصري
بيثور بكلمة حق
ويقول للباطل لأ
بينظم نفسه بنفسه
ولو الموت بابه دق
يا اهل مصر يا كرام
الثورة مش محتاجة كلام
ولا هي فوضى واعلام
الثورة دي قلب طاهر
فلاح برتبة ماهر
جندي ع الحدود ساهر
وجدة للتاريخ تحكي
ومحمد من القرآن يبكي
وميلاد برمضان يهني
مدرس ضميره صاحي
مدير للروتين ماحي
الثورة شغل وعمل
ماهيش اعتصام وكسل
النار مش ناتج عفوي
والجنة مش صنع بشر
فيا بشر طلع القمر
سيبوا القمر وابنوا مصر
حي ع الثورة
حي ع الكفاح
