بقلم : مجاهدهيثم
فاكره لما عينيا جت في عينيكى صدفه من زمان ؟؟
كنت خايف وانتى خايفه
كنت شايف وانتى شايفه
كنت عارف وانتى عارفه
كنت حاسس انى ليكى .. انى بيكى .. إن قلبى مشتريكى
….
كنت خايف م الزمن ليبيع هوانا
م الأمل ليضيع معانا
كنت خايف م اللقاء زى الوداع
كنت خايف م اللى جاى و م اللى ضاع
….
كنت شايف قلبى طاير م السعادة
وكل ما يهدى اقوله افرح زيادة
كنت شايف فيك بدايتى ونهاياتى
كنت شايف جوه نن عينيك حياتى
….
كنت عارف انك أصعب م الخيال
وان بعدك عن حياتى فوق الاحتمال
كنت عارف لون مشاعرك
كنت عارف انى فارسك وانى شاعرك
….
كنت حاسس انى ليكى مهما كان
كنت حاسس انى بيكى مهما فراقنا المكان
كنت حاسس إن قلبى مشتريكى من زمان
فاكره لما عينيا جت فى عينيكى صدفه أيه اللى كان